Xəbər verildiyi kimi, Rusiya ötən gecə növbəti dəfə Ukraynanın iri şəhərlərini hədəf alaraq, mülki infrastruktura ağır raket zərbələri endirib. Nəticədə xeyli sayda ölən və yaralananlar var.
Açıq hərbi cinayət olan bu hücumda da son zamanlar tez-tez olduğu kimi, əsas hədəf paytaxt Kiyev olub. Ukrayna Prezidenti Volodimir Zelenski Rusiyanın növbəti terror hücumu ilə bağlı paylaşımında hücum nəticəsində Kiyevdəki Azərbaycan səfirliyinin də zədələndiyini, səfirlik binasının ziyan gördüyünü qeyd edib.
Bu, ilk dəfə deyil ki, Kiyevdəki səfirliyimiz Rusiyanın raket hücumlarının dolayısı hədəfinə çevrilir. Raketlər səfirliyimizin yaxınlığna düşür və nümayəndəliyimizə ciddi ziyan vurur.
Təkcə bu il ikinci dəfədir ki, Kiyevdəki nümayəndəliyimizin binası Rusiyanın raket zərbəsi nəticəsində ciddi xəsarət alır. Bu da haqlı olaraq, həmin zərbələrin təsadüfi olmadığı barədə qənaət yaradır. Ən azından ona görə ki, Ukraynadakı həmvətənlərimizin də dediyi kimi, səfirliyimizin yaxınlığında heç bir hərbi obyekt, yaxud vacib infrastruktur obyekti yoxdur. Belə olan halda, həmin əraziyə növbəti raket hücumunun hədəfi nə ola bilər? Bu, əgər səhv və xətadırsa, nədən dəfələrlə təkrarlanır?
Özü də budəfəki raket daha yaxına düşüb və səfirliyimizin binasına, eləcə də nümayəndəliyin avtomobillərinə ciddi zərər vurub.
Xatırladaq ki, bu yay Rusiya səfirliyimizə vurduğu ziyanla bərabər, Azərbaycanın Ukraynadakı enerji infrastrukturuna – SOCAR-ın obyektlərinə də açıq şəkildə zərbələr endirib. Odessa vilayətindəki SOCAR obyektləri ağır zərbələrin hədəfinə çevrilib, nəticədə böyük yanğınlar baş verib və şirkətə ciddi ziyan dəyib. Bu hücumların bilərəkdən, Azərbaycan şirkətinin hədəf alınaraq edildiyi heç bir şübhə doğurmur.
Bütün bunların fonunda sözsüz ki, ötən gecə Kiyevdəki səfirlik binamızın yaxınlığına raket atılması da qətiyyən təsadüfə bənzəmir.
Politoloq Elxan Şahinoğlu da bu hadisə ilə bağlı şərhində Rusiyanın səfirliyimizin olduğu ərazini bilərəkdən hədəf almasına eyham vurub: “Məşhur deyim var: “Mərmi iki dəfə eyni yerə düşə bilməz”. Ancaq nə “hikmətdirsə” Rusiyanın Kiyevə raket zərbələri nəticəsində hər dəfə mərmilər Azərbaycanın Ukraynadakı səfirliyinin yaxınlığına düşür. Bu, il ərzində ikinci oxşar hadisədir. Rusiyanın ötən gecə Kiyevə endirdiyi raket zərbəsi nəticəsində “İskəndər” tipli raketin qəlpələri Azərbaycanın Ukraynadakı səfirliyinin binasına düşüb. Zərbə nəticəsində səfirliyin divarının bir hissəsi çöküb, pəncərələr sınıb, diplomatlarımızın maşınları zərər görüb. Kiyevə ötən axşam edilən raket hücumları zamanı mülki insanlar həlak olublar. 2022-ci ildə də Azərbaycanın Kiyevdəki səfirliyi yaxınlığına iki dəfə raket düşmüşdü və nəticədə binanın divarlarında çatlar əmələ gəlmişdi. Səfirlik hər hücumdan sonra raket zərbələrinin nəticələrini aradan qaldırsa da, bu uzun çəkmir və səfirlik ətrafına yenidən mərmi düşür. Kiyevdə bir başqa ölkənin səfirliyi Azərbaycan səfirliyi qədər ziyan görməyib. Bunu təsadüf saymaq olarmı?” /azpolitika.info
