ABŞ-ın keçmiş dövlət katibi Mayk Pompeo “Flamingo” raketlərinin istehsalçısı olan Ukraynanın müdafiə şirkəti “Fire Point”in məsləhət şurasına daxil olub.
“Associated Press” yazır ki, 12 noyabrda şirkət məsləhət şurası yaradıb və Pompeonu onun üzvü təyin edib. Bununla yanaşı, idarə heyətinə daha üç nəfər daxil olacaq.
Şirkətin baş texniki direktoru İrina Terex bildirib ki, “Fire Point” həmçinin böyük bir beynəlxalq şirkətə qiymətqoyma və istehsalın müstəqil auditini aparmağı tapşırıb.
Tənqidçilər isə şirkətin mənşəyinin qeyri-şəffaf olduğunu, Müdafiə Nazirliyi ilə müqavilələrdə monopoliyaya malik olduğunu, həmçinin prezident Vladimir Zelenskinin yaxın ətrafından olan, böyük bir korrupsiya qalmaqalında adı hallanan Timur Mindiçlə ehtimal edilən əlaqələrə malik olduğunu qeyd edirlər, – AP yazır.
Nəşrin məlumatına görə, “Fire Point” qanadlı raketlərin istehsalı üzrə fəaliyyətini genişləndirməyə çalışır, hazırkı gücünü iki dəfədən çox artırmağı planlaşdırır və Danimarkada raket yanacağı istehsal edən zavod tikir.
Bu il şirkətin gəliri təxminən 1 milyard dollar təşkil edib.
Şirkət rəhbərlərinin sözlərinə görə, “Fire Point” “Flamingo” raketini ən azı dörd dəfə döyüş şəraitində uğurla sınaqdan keçirib. Avqustun sonunda raket işğal altındakı Krımın Armansk şəhərində FSB bazasına zərbə endirmək üçün istifadə edilib. Ötən həftə isə raket Rusiyanın Oryol şəhərində hədəflərə zərbə vurmaq üçün tətbiq olunub. Şirkət istehsal gücləri ilə bağlı məlumatı təhlükəsizlik səbəblərinə görə açıqlamayıb, lakin istehsalın plana uyğun getdiyini bildirib.
“Sınaqlar və tənzimləmə daim davam edən prosesdir”, – şirkətin konstruktor şöbəsinin rəhbəri Maksim deyib.
“O vaxta qədər biz təlim buraxılışlarını həyata keçiririk, çünki raketlərimiz cəmi yarım il əvvəl istehsal olunub. Hazırda məşqlər aparırıq, amma bunlar Rusiya və Krım ərazisindəki obyektlər üzrədir”, – o bildirib. Onun sözlərinə görə, işçilər növbəti missiyada istifadə olunacaq, bu dəfə qara rəngə boyanmış raketin buraxılışının imitasiya sınağını keçiriblər.
28 oktyabrda prezident Vladimir Zelenski bildirib ki, Ukraynanın “Flamingo” raketi uğurlu döyüş tətbiqinə malikdir. “Le Figaro” yazıb ki, raket real əməliyyatlarda 9 dəfə istifadə olunub.
Bununla yanaşı, ekspert Pavel Naroznı qeyd edir ki, “Flamingo” raketinin 3000 km-lik elan olunmuş məsafəsi tamamilə real görünür, lakin onun texnoloji baxımdan başqa problemləri var. Onun sözlərinə görə, raketin radarlarda daha az görünməsi üçün 50 metrə qədər hündürlükdə uçması lazımdır, lakin “Flamingo”nun naviqasiya sistemi bunu etməyə imkan vermir./qaynarinfo .az
