“Qarabağ” ötən gecə Çempionlar Liqasının əsas mərhələsində məğlub olsa da, komandanın inamlı çıxışı, xüsusən də polşalı qapıçısı Mateuş Koxalskinin qurtarışları göz oxşadı.
Növbəti dəfə diqqət mərkəzinə düşən 25 yaşlı qolkiperlə bağlı maraqlı məqamları təqdim edirik.
“Qarabağ”da çıxışı sayəsində ikinci dəfə Polşa millisinə dəvət alan Koxalski bu həyacanı daha öncə Mixal Probierzin dövründə yaşamışdı. Amma o zaman Koxalski yığmanın çalışdırıcısının dördüncü qapıçı seçimi idi.
Ötən il “Qarabağ”a transfer olunan və 3+1 illik sözləşmə imzalayan qolkiper “Stal Mielets”in heyətində mövsümün qapıçısı seçilib. Baxmayaraq ki, həmin il komandası Polşa çempionatında heç ilk beşliyə belə düşməmişdi:
“Mən o zaman şoka düşdüm. Hətta mövsümün ən yaxşı qapıçısı adına namizəd olmağım məni təəccübləndirdi. Namizəd olacağımı gözləmirdim, çünki – yaxşı seyvlər etsəm də, “Stal” mövsümün sonunda ilk beşliyə daxil deyildi. Bunun belə bitməsi daha sevindiricidir”.
2022-ci ilin yayından “Stal Mielets”in şərəfini qoruyan Koxalski bunadək “Legionoviya Legionovo”, “Radomyak Radom” və “Legiya Varşava”da da forma geyinib. Ağdam klubu onun transferi üçün 900 000 avro ödəyib.
Koxalski rok musiqisini sevir:
“Mənim üç gitaram var. Ancaq virtuoz deyiləm. Sadəcə, vaxtaşırı ifa etməyi xoşlayıram. Şübhəsiz ki, futbolçuların nadir sevdiyi ağır musiqinin pərəstişkarıyam. Heç bir paltardəyişmə otağında bəyəndiyim musiqinin pərəstişkarı ilə rastlaşmamışam. Bu, mənim hobbimdir. Əhvalımdan və günümdən asılı olaraq rok, punk rok, metal dinləyirəm. Daha sərt musiqi məni motivasiya edir və enerji verir”.
Koxalskinin sol qolunda olduqca fərqli döymə var. Bu, Varşava üsyanına aiddir. Vətənpərvər olduğunu bildirən qolkiper bu döyməyə görə heç vaxt peşiman olmadığını qeyd edir.
“Stal”da ardıcıl ikinci mövsüm ehtiyat oyunçular skamyasında əyləşməli olan Koxalski bunu bir qapıçının başına gələ biləcək ən pis şey adlandırır. Buna baxmayaraq, o əzmkarlıqla məşqlərini davam etdirir. Mövsümün sonuna qədər Koxalskinin icarəyə göndərilmə variant olsa da, klub prezidenti və məşqçilər korpusu onu inandırmağa çalışır və zamanla əsas heyət üzvünə çevrilir.
Koxalski “Qarabağ”a keçidini isə belə xatırlayır:
“Başqa klublardan müəyyən maraq var idi, amma mənə konkret təklif gəlmədi – birincisi budur. İkincisi, fürsət yaranandan özümü daha yüksək səviyyədə sınamaq istədim. Ömrümün sonuna qədər “Stal”da oynamaq istərdim, amma hər bir futbolçu növbəti addımı atmaq istəyir. Uşaqlıqdan – yəqin ki, hər bir oğlan kimi – ən yüksək səviyyədə oynamaq arzusunda idim. Bununla belə, bilirdim ki, yüksək səviyyəyə çatmaq üçün başqa bir pilləyə qalxmalıyam, ondan da daha yüksək səviyyəyə qalxacağam. Geriyə baxanda hər şeyin yaxşı getdiyini düşünürəm. Azərbaycan haqqında heç nə bilmirdim – ölkə barəsində onlayn oxumalı oldum, çünki burada oynamaq imkanım olacağını gözləmirdim. Hamı daha çox Top 5 liqaları və ya böyük Avropa klubları haqqında düşünür. Bakıya enəndən sonra tez başa düşdüm ki, buradakı insanlar çox mehriban və yardımseverdirlər. Klub məni çox yaxşı qarşıladı, ona görə də başa düşdüm ki, hər şey tamamilə qaydasındadır”.”.
25 yaşlı qolkiper ilk Çempionlar Liqası matçına çıxmazdan əvvəl günün yarısına qədər bu möhtəşəm əsərə qulaq asıb:
“İlk oyundan əvvəl Çempionlar Liqasının himnini ifa etdim və günün yarısında ona qulaq asdım (gülür). Meydançaya çıxmaq tamam başqa hissdir. Mən həmişə matçlardan əvvəl stress keçirməməyə çalışıram, amma başlanğıcda stress var idi – amma bu, daha çox həvəsləndirici idi. Bu, gerçəkləşən bir xəyal idi, amma xəyallar heç vaxt bitməz. Bu, mütləq zirvə deyil, hələ çox uzun bir yol var və mən qətiyyən dayanmıram.
Düzünü desəm, matçdan sonra bunun baş verdiyinə inana bilmədiyim üçün güldüm. Bəziləri deyə bilər ki, kiminsə nəyəsə bu qədər tez nail olub, qısa zamanda bu qədər arzularını həyata keçirməsi ancaq filmlərdə olur. Özümü bir yerdə hiss etdim. Göz yaşları yox idi, amma şoka düşdüm və inanılmaz dərəcədə xoşbəxt oldum. Mənim üçün kimə qarşı oynamağımızın fərqi yoxdur – istər “Çelsi” olsun, istər Azərbaycan liqasının klubu – mən həmişə qalib gəlmək istəyirəm və buna inanıram. Amma bunu belə tez və üslubda etməyimiz məni şoka saldı. “Çelsi”nin qapıçısı Robert Sançeslə forma dəyişdim. Mənim kumirim həmişə Artur Boruc olub. Amma İker Kasilyasın oyununu və reflekslərini yüksək qiymətləndirmişəm.
Mən qapıçılığa bir az fərqli “iş” kimi baxıram və heç vaxt kiməsə pislik arzulamamışam. Məqsədim hər qapıçıdan bir köynək toplamaqdır. İndiyə qədər onları hər biri ilə dəyişdirməyi bacardım, buna görə də onun köynəyi ilə daha da xoşbəxtəm, baxmayaraq ki, onun nəticədən çox üzüldüyünü görsəm də”.
“Mənim karyeramın zirvəsi? Düşünürəm ki, “Qızıl top”u qazansaydım (gülür). Əlbəttə, zarafat edirəm, çünki nəzəri cəhətdən mümkün deyil – lakin mən “Stal”da ehtiyat oyunçular skamyasında oturanda iki ildən sonra Çempionlar Liqasında oynayacağım çox adama qeyri-real görünürdü. Mən də mütləq çalışıram ki, Polşa millisində debüt edim, sonra sinəmdəki qartalla mümkün qədər çox oynayım” – Koxalski bildirir.
