Mədəniyyət Nazirliyinin əməkdaşının etdiyi bu əməlləri cənab nazir Adil Kərimli bilmir, yoxsa görmür? Niyə ölçü götürülmür? Niyə bizi hər yerdə “qara siyahı”ya salmağa çalışırlar? Niyə ictimaiyyətdə haqqımızda həqiqətə uyğun olmayan fikir formalaşdırılır? Məqsəd nədir? Bəzi özəl televiziya kanalları niyə bu mövzuda neytral mövqe tutmurlar? Bu təzyiqləri kim edir və necə edir?
Bu sualları nazirə müğənni Nura Suri ünvanlayıb. Nəğməkar şair Vüqar Əhmədin saxlanılması xəbərinin yayılmasından sonra Daxili İşlər Nazirliyinə və nazir Vilayət Eyvazova müraciət edən müğənni təhlükədə olduğunu deyir. O bildirib ki, bütün bu olanlardan sonra efirlər ona qadağa qoyub:
“Keçən il Mədəniyyət Nazirliyinin əməkdaşı Mənzər Nurəliyeva ilə bağlı təxminən 20-yə yaxın sənətçidən Mədəniyyət Nazirliyinin Daxili Nəzarət Şöbəsi tərəfindən (Fərid bəy vasitəsilə) izahat alınmışdı. Bu sənətçilərin bir-biri ilə nə dostluğu, nə də tanışlığı var idi. Həmin izahatlar heç bir nəticə vermədi və problemlər həllini tapmadı.
Bu il problemlər yenidən davam etdi və bir postun altında yazdığımız şərhdən sonra məsələ saytlar və bir neçə televiziya proqramı tərəfindən işıqlandırıldı. Bundan sonra mənə qarşı müxtəlif sayt və səhifələrdə absurd, təhqir, şər və böhtan xarakterli yazılar dərc olundu. Daha sonra məlum oldu ki, haqqımızda qərəzli məqalələr yazan bəzi saytların nazirliklə maliyyə bağlılığı və müqavilələri var. Mən də bunu Facebook səhifəmdə paylaşdım.
Bu proseslər fonunda haqqımızda xoş söz yazan insanların inboxuna bizimlə bağlı həqiqətə uyğun olmayan, şər-böhtan xarakterli mesajlar göndərildi: “siz bilmirsiniz, filankəs göründüyü kimi deyil” və s. Ardınca qeyri-rəsmi efirlərə “zapret” qoyuldu.
Dünən Vüqar Əhməd məsələsi gündəmə gəldi. Sabah nələr olacağını Allah bilir. Bütün bunlar sanki bir Netflix serialının ssenarisidir, amma təəssüf ki, deyil — bunlar başımıza gələn real hadisələrdir.
Bu hadisələrdən əvvəl bizi görəndə qucaqlayıb öpən, “sənət dostu” adlandırılan insanlar (əslində dost demək olmaz) qorxularından bir zəng belə edib maraqlanmadılar. Təsəvvür edirsinizmi?
Mədəniyyət Nazirliyinin əməkdaşının etdiyi bu əməlləri cənab Adil Kərimli bilmir, yoxsa görmür? Niyə ölçü götürülmür? Niyə bizi hər yerdə “qara siyahı”ya salmağa çalışırlar? Niyə ictimaiyyətdə haqqımızda həqiqətə uyğun olmayan fikir formalaşdırılır? Məqsəd nədir? Bəzi özəl televiziya kanalları niyə bu mövzuda neytral mövqe tutmurlar? Bu təzyiqləri kim edir və necə edir?”.
N.Suri bildirib ki, Mədəniyyət Nazirliyinin əməkdaşı ilə yaxınlarda etdiyi söhbətdən sonra problemin həll olunduğunu düşünüb:
“10 dekabr tarixində Mədəniyyət Nazirliyində Elçin bəylə ətraflı söhbətimiz oldu. Nazirlik tərəfindən mənə qarşı heç bir qərəzin olmadığı bildirildi. Mənim və sənət dostlarım üçün məsələ bitmiş hesab olunurdu və bu mövzunu uzatmaq fikrimiz də yox idi. Amma dünən Əli Vəliyevin yaydığı məlumatdan sonra anladım ki, bu məsələ heç vaxt bitməyəcək və təzyiqlər davam edəcək.
Məcbur edirsiniz ki, buradan köçüb gedək? Nə istəyirsiniz? Niyə problemləri görməzdən gəlirsiniz?
İndiyə qədər hər hansı problemim olanda (hətta qonşudan evimizə su axdığı zaman belə) polisə müraciət etmişəm və hər zaman operativ reaksiya göstərilib, kömək ediblər.
Dünən yazdığım statusda Daxili İşlər Nazirliyini işarələmişdim. Bir saat sonra zəng edib maraqlandılar – sağ olsunlar”./tribuna.az
