Türkiyə xarici işlər naziri Hakan Fidan yanvarın 15-də mətbuat konfransında regional məsələlər, Ermənistan-Azərbaycan və Ermənistan-Türkiyə münasibətləri, həmçinin “Tramp Marşrutu” layihəsindən danışıb. Ermənistan mediası və bəzi siyasi dairələr onun açıqlamalarını təhrif ediblər.
Bu barədə Ermənistanın faktların yoxlanılması platforması Fip.am yazıb.
Mətbuat konfransı zamanı Ermənistanla bağlı hissədə Hakan Fidan Ermənistan xarici işlər naziri Ararat Mirzoyanın Vaşinqtona səfəri zamanı “Tramp Marşrutu” ilə bağlı əldə edilmiş razılaşmaya toxunaraq, bəzi texniki problemlərin mövcud olduğunu bildirib. O əlavə edib ki, Türkiyə və Azərbaycan da bu razılaşmanı araşdırır, məsələni Azərbaycan xarici işlər naziri Ceyhun Bayramovla müzakirə edib.
Prosesdə Türkiyənin gözləntilərindən danışarkən xarici işlər naziri qeyd edib:
“Gözləntimiz budur ki, Azərbaycan və Ermənistan arasında əldə edilmiş ilkin razılaşma yekun imza ilə başa çatsın və Türkiyə ilə Ermənistan arasında münasibətlərin tənzimlənməsi mümkün qədər tez həyata keçirilsin ki, bölgədə sabitlik və rifah yolunda irəliləyə bilək. Hazırda Azərbaycan, Ermənistan və Türkiyə siyasi rəhbərliklərində bu iradə mövcuddur, hər üç tərəf bu niyyətə sahibdir və Ermənistandan yerinə yetirilməsi tələb olunan yalnız bir neçə addım var”.
Fidan həmçinin qeyd edib ki, Ermənistanda 2026-cı ilin iyun ayında seçkilər keçiriləcək və bu proses mühüm mərhələ olacaq:
“Gördüymüz budur ki, Ermənistan Baş naziri Nikol Paşinyan hazırda ictimai rəylərdə liderdir. Onun səmimi şəkildə bu məsələdə göstərdiyi konstruktiv rolunu yüksək qiymətləndiririk. Bu yanaşma, bu iradə davam etdirilməlidir”.
Ermənistanda necə təqdim edilib?
Ermənistan mediası və əsasən müxalif siyasi dairələr yanlış məlumat yayaraq iddia ediblər ki, Hakan Fidan Türkiyənin gələcək seçkilərdə Nikol Paşinyana dəstək verəcəyini bildirib.
Məsələn, “Respublika” Partiyanın üzvü, deputatı Anna Mkrtçyan Feysbukda yazıb:
“Türkiyə xarici işlər naziri açıq şəkildə bildirib ki, gələcək seçkilərdə Nikol Paşinyana dəstək verəcəklər”.
“Sputnik Ermənistan”ın şərhçisi Arman Abovyan bildirib:
“Türkiyə xarici işlər naziri Hakan Fidan söyləyib ki, Türkiyə gələcək seçkilərdə Nikol Paşinyana dəstək verəcək”.
Rusiyalı iş adamı Samvel Karapetyanın “Bizim Yol” hərəkatının koordinatoru Narek Karapetyan da bu dezinformasiyaya qoşulub:
“Türkiyə xarici işlər naziri bəyan edib ki, Türkiyə 2026-cı il seçkilərində Paşinyana dəstək verəcək”.
“Tert”, “Kanal 5” və “Yerkir” saytları da belə yazıblar:
“Türkiyə Ermənistan seçkilərində Nikol Paşinyana dəstək verir”.
Hakan Fidanın rəsmi bəyanatında isə Türkiyənin Ermənistan seçkilərinə müdaxilə etdiyi və ya Nikol Paşinyanı namizəd kimi dəstəklədiyini göstərən heç bir ifadə yoxdur. Türkiyə xarici işlər nazirinin sözlərində vurğulanan odur ki, seçkilər olacaq və sorğulara görə Paşinyan liderdir, Ankara onun regional və dövlətlərarası proseslərdə göstərdiyi konstruktiv rolunu yüksək qiymətləndirir. Beləliklə, Ermənistanın bəzi media qurumları və siyasi dairələri Fidana aid olmayan ifadələri onun adına yazaraq yanlış təsəvvür yaradıb ki, Türkiyə Ermənistanın daxili siyasətinə müdaxilə edir.
