“Avropada sülh Türkiyə ilə güclü tərəfdaşlıq qurmaq deməkdir”
Ukrayna ilə bağlı sülh danışıqları intensivləşdikcə, Türkiyənin müharibədən sonrakı nizamda, xüsusən də Qara dəniz bölgəsində sülhməramlı və regional vasitəçi kimi potensial rolu onu Avropa Birliyi üçün vacib tərəfdaşa çevirir.
“Politico”-da dərc edilən məqalədə belə deyilir və qeyd olunur ki, Brüssel hazırda bu istiqamətdə Ankara ilə münasibətlərdə ilk addımları atır.
Münasibətləri yaxşılaşdırmaq üçün bu gün Türkiyəyə səfər edən AB-nin Genişlənmə üzrə Komissarı Marta Kos mətbuata açıqlamasında deyib: “Ukraynada sülh, xüsusən də Qara dəniz bölgəsindəki reallığı dəyişdirəcək. Türkiyə bizim üçün çox vacib tərəfdaş olacaq. Avropada sülhə və sabitliyə hazırlaşmaq Türkiyə ilə güclü tərəfdaşlıq qurmaq deməkdir”.
Yazıda qeyd olunur ki, Türkiyənin NATO-da ikinci ən böyük silahlı qüvvələri var və ölkə Aralıq dənizində, Yaxın Şərqdə mühüm strateji mövqe tutur. Ankaranın Bosfor boğazına nəzarət etməsi regional təhlükəsizliyə böyük təsir göstərir və bu, 2022-ci ilin iyul ayında Ukrayna taxılını daşıyan gəmilərin təhlükəsiz keçidini təmin edən Qara Dəniz Sazişinin bağlanmasında əsas rol oynayıb.
Türkiyə həmçinin Rusiya ilə razılaşma əldə olunarsa, Ukraynaya sülhməramlı qoşunlar göndərməyə hazır olduğunu və Qara dənizdə təhlükəsizliyin təmin edilməsində aparıcı rol oynayacağını bəyan edib.
Qəzet yazır ki, bununlıa yanaşı, son illərdə AB ilə Türkiyə arasındakı münasibətlər, xüsusilə müxalifətlə bağlı həbslər başda olmaqla, daxili siyasi məslələr səbəbindən xeyli pisləşib.
Qeyd olunur ki, Türkiyə rəsmi olaraq AB üzvlüyünə namizəd olsa da, danışıqlar 2018-ci ildən bəri dondurulub. Lakin, ABŞ Prezidenti Donald Trampın başlatdığı geosiyasi və ticarət münasibətlərindəki dəyişiklik Avropa ilə Türkiyəni yenidən bir-birinə yaxınlaşdıra bilər.
“Dünya dəyişir və tarix sürətlənməkdədir. Türkiyə ilə AB arasındakı münasibətlərin də buna uyğunlaşması lazımdır… Türkiyənin strateji məqsədi Avropa Birliyinə qoşulmaq olaraq qalır və bu, münasibətlərimizdə istiqamətverici işıq olmalıdır”, – deyə Türkiyənin AB-dəki səfiri Yaprak Balkan “Politico”-ya bildirib.
Bütün bunlara baxmayaraq, nəşr qeyd edir ki, AB üzvlüyü danışıqlarının bərpası hazırda qurumun gündəliyində deyil. Lakin Kos deyib ki, “AB Türkiyə ilə əlaqələrinə yeni baxış keçirməlidir”: “Ankaraya səfərim etimadın bərpasına və hər iki tərəf üçün iqtisadi münasibətlərimizi necə inkişaf etdirə biləcəyimizi araşdırmağa həsr olunub”.
Göründüyü kimi, Avropa xüsusilə Ukraynada yaşadığı çətinliklər, özünün hərbi acizliyi fonunda, “işi düşdüyü” üçün Türkiyənin ayağına gəlir, lakin qardaş ölkənin Avropa Birliyinə qəbuluna qətiyyən tələsmir. Ancaq zaman, şərtlər dəyişir, hadisələr olduqca sürətlə cərəyan edir və bir gün Avropa Birliyinin özünün Türkiyəyə “elçi düşməsini” görsək, buna təəccüblənməməliyik… /azpolitika.info
