Ötən il 515 min dollarlıq heykəl Azərbaycana gətirilib – Sifarişçi yüksək vəzifəli məmurdur?

Tendensiya.com rəsmi statistikaya istinadən xəbər verir ki, heykəl ölkəyə Niderlanddan idxal olunub. İddialara görə, həmin əsər yüksək vəzifəli məmurlardan birinin sifarişi əsasında ölkəyə gətirilib. Rəsmi məlumatlara görə, ötən il ərzində 2,5 milyon dollardan çox dəyərində incəsənət malları idxal edilib.

Məsələnin diqqətçəkən tərəfi isə hökumətin bu sahədə qanunvericiliyə dəyişiklik təşəbbüsü ilə çıxış etməsidir. Təklif artıq Azərbaycan Respublikasının Milli Məclisinə təqdim olunub.

Layihəyə əsasən, müvafiq icra hakimiyyəti orqanının müəyyən etdiyi qurumun təsdiqedici sənədi əsasında xarici iqtisadi fəaliyyətin mal nomenklaturası üzrə siyahıya daxil edilən incəsənət əsərləri, kolleksiya və əntiq əşyaların idxalı 18 faiz əlavə dəyər vergisindən (ƏDV) azad ediləcək.

İqtisadçı Natiq Cəfərli sosial şəbəkədə bu təşəbbüsü sərt tənqid edib. O, qərarın sosial ədalət prinsipləri ilə ziddiyyət təşkil etdiyini vurğulayıb.

İqtisadçının ironik qeydlərinə görə, 350 manat təqaüd alan vətəndaşlar və ya 700 manat maaşla dolanan insanlar üçün bahalı əntiq əşyaların ƏDV-dən azad edilməsi “sevindirici xəbər” kimi təqdim olunur. Halbuki, cəmiyyətin böyük hissəsi üçün prioritet məsələ dərmanların, uşaq qidalarının və əsas ərzaq məhsullarının qiymətidir.

Natiq Cəfərli qeyd edir ki, illərdir dərman vasitələrində və sosial əhəmiyyətli məhsullarda 18 faiz ƏDV-nin azaldılması və ya ləğvi təklif olunsa da, bu istiqamətdə ciddi addım atılmayıb. Əvəzində isə məhdud sayda kolleksiyaçı və imkanlı şəxslərin maraqlarına xidmət edən güzəşt gündəmə gətirilib.

Qanun layihəsində istisna muzeylər və ya dövlət sərgiləri üçün ayrıca mexanizm kimi nəzərdə tutulmur. Yəni güzəşt bütün idxalçılara şamil edilə bilər. Bu isə qərarın mədəniyyət siyasətindən çox, fərdi maraqlara xidmət etdiyi barədə suallar doğurur.

Əgər məqsəd ölkəyə mədəni irsin və incəsənət nümunələrinin gətirilməsini təşviq etməkdirsə, ekspert hesab edir ki, güzəşt yalnız dövlət muzeyləri, sərgi mərkəzləri və ictimaiyyət üçün açıq mədəniyyət ocaqları ilə məhdudlaşdırıla bilərdi. Hazırkı formada isə vergi azadolması büdcəyə daxilolmaları azaldaraq sosial ədalət baxımından mübahisəli qərar təsiri bağışlayır./poliqon.az