Yay mövsümünün yaxınlaşması ilə Azərbaycanın turizm bölgələrində kirayə ev və bağ evlərinin qiymətlərində artım müşahidə olunur.
Araşdırmamıza görə xüsusilə Quba, Qusar, Şəki, Qəbələ, İsmayıllı, Lənkəran və Nabran kimi istirahət zonalarında gündəlik və aylıq kirayə qiymətləri ötən aylarla müqayisədə daha yüksək təklif edilir.
Yay aylarında bölgələrə turist axınının artması bazarda qiymətlərə birbaşa təsir edir. Daşınmaz əmlak bazarında fəaliyyət göstərən mütəxəssislər xüsusilə may ayının sonundan etibarən kirayə evlərə tələbatın sürətlə artdığını bildirirlər. Bu səbəbdən ev sahibləri qiymətləri mərhələli şəkildə qaldırmağa başlayırlar.
Müşahidələr göstərir ki, hazırda bəzi turizm rayonlarında günlük kirayə verilən bağ evlərinin qiyməti 80-100 manatdan başlayır. Daha komfortlu və hovuzlu evlərdə isə qiymətlər 300-500 manata qədər yüksəlir. Bayram günləri və həftəsonlarında isə qiymətlər daha da artır.
Əmlak məsələləri üzrə ekspertlər hesab edirlər ki, qiymət artımına təsir edən əsas amillərdən biri təklifin tələbi tam qarşılamamasıdır. Yay mövsümündə ailələrin bölgələrdə istirahətə üstünlük verməsi kirayə bazarında aktivliyi artırır. Bundan başqa, hotellərdə qiymətlərin yüksəlməsi də bəzi turistlərin fərdi ev və kotteclərə yönəlməsinə səbəb olur.
Son aylarda ölkədə kirayə mənzil bazarında ümumi bahalaşma müşahidə edilir. Yay mövsümü yaxınlaşdıqca bu artım daha da sürətlənir.
Bölgələrdə xüsusilə günlük kirayə bazarı daha sürətlə bahalaşır. Ötən illərlə müqayisədə bu il erkən rezervasiyaların sayında da artım var. Turizm şirkətləri bildirirlər ki, bəzi məşhur istirahət məkanlarında iyun və iyul ayları üçün evlərin bir hissəsi artıq bron edilib.
Mütəxəssislər vətəndaşlara yay mövsümündə yüksək qiymətlərlə qarşılaşmamaq üçün əvvəlcədən rezervasiya etməyi tövsiyə edirlər. Onların fikrincə, mövsüm tam başladıqdan sonra həm seçim imkanları azalır, həm də qiymətlər daha yüksək olur.
Rəsmi statistikalar da kirayə bazarında artımı təsdiqləyir. Son məlumatlara əsasən, ölkədə kirayə mənzillərin orta qiymətində illik artım qeydə alınıb. /milli.az
