Prezident İlham Əliyevin imzaladığı yeni fərmana əsasən, İpoteka və Kredit Zəmanət Fondunun nizamnamə kapitalı 85 milyon manat artırılıb. Bu artım nəticəsində Fondun ümumi nizamnamə kapitalı 1 milyard 153 milyon manata çatıb.
Milli Məclisin deputatı, iqtisadçı Vüqar Bayramov hesab edir ki, bu addım vətəndaşların mənzil almaq imkanlarını artıracaq. O qeyd edib ki, nizamnamə kapitalının artırılması dövlət büdcəsindən güzəştli ipoteka kreditlərinin maliyyələşdirilməsi üçün əlavə vəsaitin ayrılması hesabına baş verir. İqtisadçının sözlərinə görə, Prezident İlham Əliyev hər il bu istiqamətdə ardıcıl şəkildə müvafiq fərmanlar imzalayır ki, bu da vətəndaşların sosial rifahına xidmət edən davamlı siyasətin tərkib hissəsidir.
Vüqar Bayramov bildirib ki, dövlət büdcəsindən ayrılan bu vəsaitlər əsasən sosial ipoteka kreditlərinin verilməsi üçün nəzərdə tutulur: “Praktik olaraq, hər maliyyə ilində güzəştli ipoteka kreditlərinin verilməsi üçün vəsait ayrılır. Həmin il ərzində bu vəsaitlər Fondun nizamnamə kapitalına əlavə olunur. Bu isə daha çox kredit təklifi deməkdir.”
Deputat vurğulayıb ki, Fondun nizamnamə kapitalının artması, eyni zamanda, portfeldə daha çox güzəştli ipoteka kreditlərinin yer almasına imkan yaradır: “Bu, daha çox vətəndaşımızın ev sahibi olmaq imkanlarının genişlənməsi deməkdir. Kapital nə qədər böyükdürsə, Fond bir o qədər çox kredit təqdim edə bilir.”
İqtisadçının sözlərinə görə, bu günə qədər İpoteka və Kredit Zəmanət Fondu tərəfindən 54 min 918 ipoteka krediti verilib. Verilmiş kreditlərin ümumi həcmi isə artıq 3 milyard 560 milyon manatı ötüb.
Vüqar Bayramov hesab edir ki, ipoteka sisteminin inkişaf etdirilməsi, xüsusilə sosial ipoteka imkanlarının genişləndirilməsi, əhalinin mənzil təminatının yaxşılaşdırılması baxımından mühüm alətlərdən biridir. Dövlətin bu istiqamətdə həyata keçirdiyi ardıcıl siyasət, vətəndaşların sosial rifahının yüksəldilməsinə, daha əlçatan mənzil bazarına çıxışına mühüm töhfə verir.
