Noyabrın 6-sına keçən gecə Rusiyanın Volqoqrad şəhərində yerləşən “LUKOIL-Volqoqradneftepererabotka” neft emalı zavoduna dron hücumu həyata keçirilib.
Bu barədə Rusiya “teleqram” kanalları məlumat və videogörüntülər paylaşıblar.
Volqoqrad vilayətinin qubernatoru Andrey Boçarov zavoda dron hücumunu təsdiqləyib. Boçarov qeyd edib ki, “Volqoqradın bir neçə rayonunda yaşayış binalarının və nəqliyyat vasitələrinin şüşələrinin zədələnməsi barədə məlumat verilib, Krasnoarmeyski rayonunun sənaye zonasında yanğına səbəb olan dağıntılar olub”.
O, həmçinin Ukraynanı 48 yaşlı kişinin ölümündə günahlandırıb. Qubernatorun sözlərinə görə, Volqoqradda çoxmərtəbəli binaya dron düşüb və nəticədə bir Rusiya vətəndaşı qəlpədən ölüb. Lakin digər mənbələr iddia edir ki, çoxmərtəbəli bina əslində Ukrayna dronu deyil, Rusiyanın “Pantsir” hava hücumundan müdafiə sisteminin raketi ilə vurulub.
Ukrayna tərəfi hələlik Volqoqraddakı neft emalı zavoduna edilən hücumla bağlı heç bir şərh verməyib.
Beləliklə, ABŞ sanksiyaları ucbatından onsuz da çox çətin duruma düşən, milyardlarla ziyan görən, xaricdəki aktivlərini dəyər-dəyməzinə satmaq məcburiyyətində qalan “Lukoil” digər yandan da Ukrayna PUA-larının hücumlarından əziyyət çəkir. Sözügedən müəssisə bundan öncə də bir neçə dəfə hücuma məruz qalıb, nəticədə zavodda yanğınlar baş verib. “Burevestnik” və “Paseydon” kimi bahalı, lakin mənasız silahlarla öyünən Kreml isə strateji müəssilərini belə adi PUA hücumlarından qorumaq iqtidarında deyil.
Qeyd edək ki, ötən gecə Ukrayan PUA-ları həm də Rusiyanın 3 ən böyük elektrik stansiyalarından biri olan Kostroma QRES-i vurub. Stansiyada yanğın başlayıb. /azpolitika.info
