Rusiya Federasiyası İstintaq Komitəsinin sədri Aleksandr Bastrıkin Bakıya göndərdiyi məktubda AZAL-a məxsus təyyarənin qəzaya uğraması ilə bağlı cinayət işinə xitam verildiyini açıqlayıb.
Politoloq Rasim Musabəyov bildirib ki, bu addım faktiki olaraq 38 sərnişin və ekipaj üzvünün həlak olmasına səbəb olan hərəkət və ya hərəkətsizliyə görə məsul şəxslərin Rusiya hüquq-mühafizə orqanları tərəfindən cinayət məsuliyyətinə cəlb edilməyəcəyini göstərir.
Politoloq qeyd edib ki, Azərbaycan Prokurorluğu bu halda müstəqil şəkildə istintaqa başlamaq hüququna malikdir. Onun fikrincə, iş materiallarında adı keçən şəxslər barəsində cinayət təqibi aparılması və onların İnterpol xətti ilə beynəlxalq axtarışa verilməsi mümkündür.
Musabəyov vurğulayıb ki, Rusiyanın və onun hüquq-mühafizə orqanlarının beynəlxalq reputasiyası, xüsusilə Ukrayna səmasında vurulan Malayziya Hava Yollarına məxsus “Boeing” təyyarəsi ilə bağlı presedent fonunda, Azərbaycanın mümkün hüquqi müraciətləri beynəlxalq ictimaiyyət tərəfindən diqqətlə izlənilə bilər.
Qeyd edək ki, xarici işlər naziri Ceyhun Bayramov da bildirib ki, AZAL təyyarəsi ilə bağlı Rusiya istintaq komitəsi tərəfindən cinayət işinə xitam verilməsi çox ciddi suallar doğurur.
Onun sözlərinə görə, Rusiya istintaq komitəsi tərəfindən Azərbaycana AZAL-ın təyyarə qəzasının istintaqı ilə bağlı məktub göndərilib: “Məktubda bizim üçün çox ciddi təəccüb doğuran məqamlar vardı. Əsas məsələ o idi ki, məktubda artıq cinayət işinə xitam verildiyi qeyd olunurdu. Şübhəsiz, belə bir addım bizdə çox ciddi suallar doğurur. Və sözügedən məktuba müvafiq qurum tərəfindən lazımi cavab göndərilib”.
Nazir vurğulayıb ki, Azərbaycanın AZAL təyyarəsinin qəzaya uğraması ilə bağlı gözləntisi Rusiya tərəfinin öhdəliklərini icra etməsidir.
“Dünən təyyarə faciəsinin ildönümü idi. Faciədə həlak olanların ailələrinə başsağlığı verirəm. Təyyarənin vurulması faktı bir müddət sonra Rusiya tərəfindən etiraf edildi və kompensasiyanın ödəniləcəyi bildirildi. Bu çox vacib açıqlama idi. Bizim gözləntimiz də bu prosesin tam icrasıdır”,- o əlavə edib.
Qeyd edək ki, Qazaxıstan tərəfinin yaydığı hesabatdan, Azərbaycan, Rusiya, Qazaxıstan, Braziliya və ICAO ekspertlərinin ümumi rəyindən də görünür ki, Aktauda qəza enişi edən AZAL təyyarəsi hər hansı texniki nasazlıq səbəbindən deyil, məhz kənar müdaxilə, konkret olaraq vurulma nəticəsində idarəetməni itirib və qəzaya uğrayıb.
Təyyarədə ümumilikdə 67 nəfər (62 sərnişin, 5 ekipaj üzvü) olub. Onlardan 42 nəfəri Azərbaycan vətəndaşıdır (37 sərnişin, 5 ekipaj üzvü), 16 nəfəri Rusiya, 6 nəfəri Qazaxıstan, 3 nəfəri isə Qırğızıstan vətəndaşıdır. Qəza nəticəsində 38 nəfər həlak olub, 29 nəfər sağ qalıb. Aviaqəza zamanı hava gəmisinin komandiri İqor Kşnyakin, ikinci pilot Aleksandr Kalyaninov və stüardessa Hökumə Əliyeva həyatını itirib.
Rusiya Prezidenti Vladimir Putin oktyabrın 9-da Düşənbədə Prezident İlham Əliyevlə görüşündə təyyarənin vurulduğunu etiraf edib. V.Putin Rusiya tərəfinin bütün müvafiq kompensasiyaları ödəyəcəyini və bütün vəzifəli şəxslərin hərəkətlərinə hüquqi qiymət verəcəyini vəd edib. Ancaq görünür, bu vədi yerinə yetirmək istəmirlər.
