Rusiya Prezidentinin mətbuat katibi Dmitri Peskov Kremlin Ukraynadakı hərbi münaqişənin həlli ilə bağlı ABŞ Prezidenti Donald Trampla əlaqələrin bərpasına ümid etdiyini bildirib.
Peskov bu açıqlamanı CNN-ə müsahibəsində verib. O, Moskvanın Vaşinqtonla münasibətləri “Amerika hazır olduğu qədər tez” yaxşılaşdırmağa hazır olduğunu vurğulayıb.
“Biz səmimi qəlbdən ümid edirik ki, Prezident Tramp Ukrayna probleminin siyasi və diplomatik həllini asanlaşdırmağa hələ də hazırdır”, – deyə Peskov qeyd edib. O, həmçinin “ikitərəfli münasibətlərin yaxşılaşdırılması, ticarət və iqtisadi əməkdaşlıq üçün yeni imkanlar açılması”nın vacibliyini vurğulayıb və əlavə edib ki, “hər iki tərəf üçün çox parlaq üfüqlər açılır”. Peskov əlavə edib ki, mövcud vəziyyət “vaxt, pul və mənfəət itkisinə” gətirib çıxarır.
Rusiyanın Xarici İşlər naziri Sergey Lavrov da bir gün əvvəl oxşar açıqlama verib. Peskovun açıqlaması, Sergey Lavrovun ABŞ-ni Vladimir Putin və Donald Tramp arasında Budapeştdə keçiriləcək sammitə hazırlıqları bərpa etməyə çağırmasından qısa müddət sonra verilib.
Xatırladaq ki, bu sammit Rusiyanın Ukraynadakı müharibəni dayandırmaqdan imtina etməsindən sonra ləğv edilib. Lavrov qeyd edib ki, Moskva guya ABŞ-nin görüşü ləğv etməsinin səbəblərini başa düşməyib. O, iddia edib ki, əvvəlki təmaslar zamanı tərəflər “yaxşı və nəzakətli söhbət aparıblar, Ankoric anlaşmalarına əsaslanaraq irəliləyişləri təsdiqləyiblər” və artıq xarici siyasət, müdafiə və kəşfiyyat orqanlarının nümayəndələri arasında danışıqlara keçməyi planlaşdırırlar: “Lakin bunun əvəzinə görüşün mənasız olduğu barədə bir açıqlama verildi”.
Lavrov həmçinin Britaniya mediasını Kremlin maksimalist tələbləri səbəbindən sammitin ləğv edildiyi barədə “informasiya kampaniyası aparmaqda və yalanlar yaymaqda” günahlandırıb.
Bundan öncə “Reuters” xəbər vermişdi ki, Tramp Rusiyanın güzəştə getmək istəmədiyi, “çox şey istədiyi” və hazırkı cəbhə xətti boyunca hərbi əməliyyatları dayandırmaqdan imtina etdiyi aydın olduqdan sonra Budapeşt sammitini ləğv edib. Agentliyin məlumatına görə, ABŞ Dövlət katibi Marko Rubio Lavrovla telefon danışığından sonra Trampa Putinlə sammiti ləğv etməyi tövsiyə edib. Budapeşt görüşünün ləğvindən sonra Vaşinqton Trampın Ağ Evə qayıtmasından bəri ilk dəfə Rusiyaya qarşı yeni sanksiyalar tətbiq edib. /azpolitika.info
