Milli Məclisin Təbbi ehtiyatlar, energetika və ekologiya komitəsinin sədri Sadiq Qurbanov parlamentin bugünkü iclasında kənd təsərrüfatı təyinatlı torpaqlarda məhsuldarlığın artırılması və hüquqi boşluqların aradan qaldırılması ilə bağlı mühüm çıxış edib.
Komitə sədri kənd təsərrüfatı dövriyyəsinə mane olan, lakin ekoloji əhəmiyyət kəsb etməyən yaşıllıqların tənzimlənməsi barədə qanun layihəsini təqdim edərək, bir sıra strateji məqamlara toxunub.
Sadiq Qurbanov bildirib ki, müasir kənd təsərrüfatı artıq ənənəvi üsullardan uzaqlaşaraq yüksək texnologiyalar üzərində qurulub. Pivot, damlama və sprinkler suvarma sistemlərinin tətbiqi, həmçinin lazerlə torpaq hamarlanması üçün əkin sahələrinin maneəsiz olması mütləqdir:“Bir çox hallarda əkin sahələrində nizamsız şəkildə yerləşmiş kol və ya ağaclar müasir texnologiyanın tətbiqinə mane olur, məhsuldarlığı azaldır və əlavə yanacaq sərfiyyatına səbəb olur. Bizim məqsədimiz meşələri məhv etmək yox, kənd təsərrüfatı dövriyyəsinə mane olan, istehsal məqsədlərinə xidmət etməyən yaşıllıqların hüquqi statusunu tənzimləməkdir”.
Çıxışda ən diqqətçəkən məqamlardan biri regionlarda çalışan fermerlərin üzləşdiyi bürokratik və hüquqi çətinliklərlə bağlı olub. Komitə sədri bildirib ki, mövcud qanunvericilikdəki qeyri-müəyyənlik səbəbindən praktikada ciddi problemlər yaşanır: “Vətəndaşlar, xüsusilə regionlarda yaşayan fermerlər, bəzən yalnız yulğun kollarının təmizlənməsinə görə ağır cərimələrlə üzləşirlər. Bu, həm torpaqdan səmərəli istifadəyə mane olur, həm də aqrar sektorda innovasiyaların tətbiqini ləngidir. Təklif olunan layihə məhz bu cür sui-istifadə və anlaşılmazlıqların qarşısını almağa xidmət edir”.
Sadiq Qurbanov çıxışında layihənin həm də ekoloji tərəflərinə toxunaraq maraqlı rəqəmlər açıqlayıb.
O qeyd edib ki, müasir texnologiyaların tətbiqi atmosferə atılan karbon qazının miqdarını 70 faizədək azaldır: “Statistikaya görə, ənənəvi əkinçilikdə 1 hektar sahədə müvafiq əməliyyatlar zamanı orta hesabla 100 kiloqram karbon qazı buraxılır. Müasir texnologiyalarla isə bu göstərici cəmi 19.8 kiloqrama qədər enir. Deməli, aqrar islahat həm də ekoloji təmizlik deməkdir”.
Su ehtiyatlarının idarə olunmasını prioritet hesab edən S.Qurbanov, beynəlxalq təşkilatların, xüsusilə FAO-nun hesabatlarına istinad edib. Bildirilib ki, yeni sistemlərin tətbiqi su sərfiyyatını 30–50 faiz azalda bilər ki, bu da hər 1 hektar sahədə qənaət edilən su hesabına əlavə 0.33 hektar torpağın əkin dövriyyəsinə cəlb edilməsi deməkdir.
Komitə sədri vurğulayıb ki, yaşıllıqların götürülməsi özbaşına deyil, yalnız aidiyyəti dövlət və bələdiyyə qurumlarının razılığı, həmçinin Ekologiya və Təbii Sərvətlər Nazirliyinin (ETSN) rəsmi rəyi əsasında həyata keçiriləcək. Bu mexanizm prosesin şəffaflığını təmin edəcək.
Sonda Sadiq Qurbanov qeyd edib ki, bu layihənin qəbulu Azərbaycanın ərzaq təhlükəsizliyi və dayanıqlı inkişaf strategiyasına mühüm töhfə olacaq./azpolitika.info
